D Tambourevereinigung Wettige und mgebig (TVWU) het die grossi Ehr gha a de 62. Internationale Militärwallfahrt in Lourdes vom 12.-16. Mai 2022 dörfe teilnäh. Nach de Uftritt a de EXPO in Dubai im Februar das Jahr, en witere Isatz für euises Land.
D TVWU sig stolz, schribt de Verein innere Mitteilig, «en Teil vo de Schwyzer Delegation si zdörfe und s’Militärspiel uf de Marschmusig und a de Ständli z’begleite». Neui Kontäkt sind knüpft, gmüetlichi Stunde verbracht und für de Friede uf de ganze Wält zäme mit 42 Natione bätet worde. Idrücklichi Moment händ TVWUler dörfe erläbe. Six ade Eröffnixfier i de unterirdische Basilika, a de Mässfier i de Grotte, ein gmeinsam gangne Chrüzwäg, oder Teilnahm a de Liechterprozession am Abig. Die Athmosphäre cha mer gar nid beschriebe. Mer muess debi gsi si, zum empfinde, wie gross die Zämeghörigkeit vo so vielne Mänsche und Hoffnig uf Friede allgägewertig gspührt werde cha. Z’beobachte mit wellere Würde Chranki und verletzti Kamerade mitgfüehrt worde sind, het eim oft au nachdänklich gstimmt.
42 Natione wo zäme ein Wäg gönd zum für Friede z’bäte und das ganz bewusst zäme zeige und läbe.
TVWU-ler sind beidruckt, ob dere unglaubliche Mission. Es isch es speziells Gfühl gis, für eimal nid nur d’Wert vo de Schwyz, sondern au euisi christliche Glaubenswurzle nach usse z’träge und dezue z’stah.
Es grosses Dankeschön gebührt em OK vo de *Association PMI Lourdes-Suisse* für die unvergässliche und wunderschöne Täg in Lourdes.
(FS)