D Holzbrugg isch iigweiht worde

Miteme Bruggefäscht hend d Gmeine Noiehof und Wettige zämme di frisch renoviert Holzbrugg gfiired. Au d Gwaggelibrugg «erstrahlt in neuem Glanz».
Lang isch es gange, bis d Holzbrugg endlich saniert gsi isch. Erschti Schäde an de Brugg het me scho in de 1990er-Johr festgstellt. Aber statt si z saniere, sind Eigetumsverhältnis diskutiert worde. Di ehemolig Kantonsstrass, wo bis zu de Errichtig vo de Hochbrugg im 1970 über d Holzbrugg gfüehrt het, isch damals uf de Wettiger Site de Gmeind Wettige übergeh worde, uf de Noiehofer Site an d Gmeind Noiehof. Über d Brugg selber hets aber im Grundbuech kein Iitrag geh, so dass sich de Kanton und die beide Gmeinde ned einig gsi si, wer d Sanierig vo dere Brugg muess zahle. Erscht nach lange Verhandlige het me sich geiniged: De gröschti Teil vo de Sanierig wird de Kanton zahle, danach goht d Brugg in de Bsitz vo de beide Gmeinde über.
Am 30. April 2022 isch es dann endlich so wit gsi, dass di beide Gmeinde de Abschluss vo Sanierig vo de Brugg und de Bsitzerwächsel hend chönne fiire. Tisch und Bänk sind uf de deckte Holzbrugg gstande, aber au vor und hinter de Brugg. Uf beidne Siite hend di jewilige Füürwehre Würscht brötled (au vegetarischi!) und au für Tranksame isch gsorged gsi. In de Mitti vo de Brugg het um Halbielfi de Festakt aagfange. Dur s Programm het de Wettiger Gmeindamme Roland Kuster gfüehrt, de Martin Uebelhart, Gmeindamme vo Noiehof het d Gschicht vo de Brugg verzällt und de Regierigsrat Stephan Attiger het es Gruesswort ghalte. Für de kirchlich Säge het de Roland Kuster de Abt vom Chloster Wettige-Mehrerau, de Pater Vinzenz iiglade gha und aaschlüssend hend di vier Manner für d Eröffnig s Band duregschnitte.
Au d Gwaggelibrugg, offiziell Paul-Fischer-Brugg, isch ins Fescht iibezoge worde, wil d Sanierig ebefalls het chönne abgschlosse werde. En Wettbewerb, bi dem me d Holzlättli vo de Brugg het müesse zähle, het zahlriichi Lüt animiert, die paar Schritt bis zu de Gwaggelibrugg unter d Füess z neh. Sind es würkli 284, wi mir vo de Wettiger Nochrichte zählt hend?