Im Gmeindranking vo de Handelszitig ischt Wettige uf Platz 7 vo de Aargauer Gmeinde. Aber bi de Ökologie gshets ned gut us.
Insgsamt sind es 936 Gmeinde, wo d Handelszitig vo IAZI het lah bewerte. Wettige landed dodebi uf Platz 130 für d Schwiiz, aber im Aargau ufeme guete Platz 7 und dodemit 6 Platz vor Ännetwettige (im Blick uf alli Gmeinde sind es 27 Plätz). Bsunders guet isch d Bewertig bi de Mobilität und em Wohne. De drittbeschti Wert het Wettige bi de Stüüre, wo mit em Platz 260 für di ganz Schwiiz schlechter isch, wi de Gsamtschnitt, aber wo wenigi Aargauer Gmeinde besser do stönd.
D Problem bi de Bevölkerigsstruktur und de Arbeitsplätz isch bekannt, het doch Wettige relativ vil Lüt, wo im Pensionsalter si und wenig Arbeitsplätz. Erschreckend isch us oisere Sicht aber s Rating bi de Ökologie. Do stoht Wettige uf Rang 929 vo 936, also uf em achtletschte Platz. D Nachfrag bi de Handelszitig het ergeh, dass vili Schwiizer Gmeinde do no ned eso guet unterwägs siged, so dass mit bim Christof Zöllig vo IAZI/CIFI nochegfröged hend, wo d Studie verfasst het. D Kriterie, wo bi de Ökologie bewertet worde sind, sind s politisch Engagement, bispilswis für s Label Energiestadt, d CO2-Emmissione, d erneuerbari Stromproduktion pro 100 Iiwohner, d Wohnflächi pro Iiwohner, d Iiwohner pro Hektar Sidligsflächi, de Grüenruum uf 1000 Iiwohner, d Hektare Wald pro 1000 Iiwohner und d Hektare offeni Gwässer pro 1000 Iiwohner. Am beschte stoht Wettige bi de Wohnflächi und bim politische Engagement do. Schlächter gsehts bi de Sidligsflächi, em Grüünruum, em Wald und de offne Gwässer us. Dete hend aber Gmeinde in de Agglomeration, wo dicht besidlet sind, au kei Möglichkeite vil z verbessere. S gröschti Potential gits bi de erneuerbare Stromproduktion, wo es mit Platz 827 no viel Luft nach obe git. Do het ned numme d Gmeind no Potential, grad we me ans Sheddach vo de Drüfachturnhalle im Margeläcker denkd, sondern au di Immobiliebsitzer, wo di gröschte Dach- und Fassadefläche hetted, zum d Stromproduktion z erhöche.