Am 28. November 2021 isch de zwöit Wahlgang für de Gmeindamme. Was würd das bedüte, we de Roland Kuster nümm aatritt?
De Roland Kuster het im erschte Wahlgang numme 156 Stimme meh gha wi de Andrea Bova und isch 127 Stimme unter em absolute Mehr blibe. Us dem Grund gits am 28. November 2021 en zwöite Wahlgang. Ob de Roland Kuster kandidiert, het er gegenüber em Badener Tagblatt offe glah.
Welli Konstellatione chönnd es geh, we de Roland Kuster nüm würd aaträte?
Wil alli sibe Gmeindrotssitz bsetzt sind und numme öpper zum Gmeindamme cha gwählt werde, wo scho gwählt isch oder bi de gliiche Abstimmig gwählt wird, chömmed numme di scho Gwählte als Kandidierendi in Frog. Zudem cha im zwöite Wahlgang numme öpper gwählt werde, wo d Kandidatur rechtzitig aameld. Stimme für anderi Persone währed ungültig. Dodemit isch d Uswahl sehr iigschränkt.
Sicher isch numme d Kandidatur vom Andrea Bova. Würd er de einzig Kandidat bliibe, gits e Nachmeldefrist vo 5 Täg und danach würde er in stiller Wahl gwählt. We de Roland Kuster also tatsächlich verzichtet, hend d Stimmbürger numme dann en Uswahl, we öppe vo de andere föif sich für e Kandidatur würd entscheide.
Keis Nocherütsche bi de Gmeindratswahle
Wil immer wider d Frog an ois anne traid worde isch, ob ned de Markus Haas würd nocherütsche, wenn de Roland Kuster d Wahl ned würd aaneh, do no e paar witeri Infos: Im Gegesatz zu de Wahle für de Iiwohnerrat, isch d Gmendratswahl e Majorz- und kei Proporzwahl. Us dem Grund gits keis Nocherütsche. Zudem hend alli Kandidierendi mit ihre Wahlaameldig scho d Wahlannahm unterschribe. Würd also de Roland Kuster ned numme uf d Kandidatur für de Gmeindamme verzichte, sondern au us em Gmeindrot welle usscheide, müesst er es Rücktrittsgsuech bim DVI iireiche, wo dann vom Kanton müesst gnehmiged werde. En Ersatzwahl gäbe also i dem Johr ehnder nümm, so het ois d Gmeind mitteild.