D Jahresrechnig vo de Iiwohnergmeind schlüsst positiv

Bieme Umsatz vo 107.3 Millione Franke schlüsst d Johresrechnig 2020 mit eme positive operative Ergäbnis. Au s Gsamtergäbnis wiist en Ertragsüberschuss us.
Dank höchere Stüüriinahme und ere Ergäbnisverbesserig bi de Sozialhilf, het d Iiwohnergmeind d Rächnig 2020 miteme Ertragsüberschuss vo 1.14 Millione Franke abgschlosse. Wi d Gmeind in de Mediemitteilig schriibd, sind di Usgabe, wo de Gmeindrot cha beiiflusse, im Griff. En grössere Ufwand wi budgetiert isch dene Bereich feschtzstelle, wo ned chönnd beiiflusst werde. So isch d Pflägfinanzierig 170’000 Franke tüürer wi budgetiert, d Spitex-Choschte um 390’000 Franke und d Chinderhort und Tagesstätte hend en Mehrufwand vo 240’000 Franke generiert. Usgliche worde sind di Merhufwänd dur e konsequenti Dossierbewirtschaftig und ere intensive Überarbeitig vo allne Abläuf und Prozess bi de Sozialhilf, so dass d Verbesserig gegenüber Budget bi 1.1 Millione Franke ligd. Rückblickend zeigd sich dodemit, dass sich d Ufstockig vom Personal rentierd het.
D Gmeindstüüre hend en Ergäbnisverbesserig vo 800’000 Franke brochd und insgsamt gibts bi de Stüüre en Mehrertrag vo öppe 1.6 Millione Franke. Das liit au an de Mehrerträg bi de Grundstückgwinnstüüre.
Belastet wird d Rechnig dur s Defizit vom Tägi, wo de Pandemie gschulded isch. Gmäss Leistigsveriibarig muess es wesentlichs Defizit im Abschluss 2020 zwinged abbilded werde. Us dem Grund het de Gmeindrot bschlosse, s Defizit vo de Tägi AG, wo im 2020 bi 1.4 Millione Franke liit, dur e churzfritigi Rückstellig erfolgswirksam i de Rechnig z berücksichtige. Ohni di Rückstellig wärs operativ Ergäbnis vo de Gmeind bi öppe 1.7 Millione Franke und d Ergäbnisverbesserig bi öppe 2 Millione Franke.
D Details zum Rechnigsabschluss sind uf de Website vo de Gmeind ufgschalte: https://www.wettingen.ch/aktuellesinformationen/1192630