Laufd im Tägi es Turnier mit 500 Schüeler?

S Online-Nochrichte-Portal NAU melded, im Tägi sig am Samschtig und Sunntig es Fuessballhalleturnier mit meh wi 500 Chind. Allei d Aazahl Chind, wo NAU melded, wirft Froge uf.

D Massnahme gege d Usbreitig vom Coronavirus sind umstritten. Dass 500 Chind uf einisch inere Sporthalle ned eso schlau wär, scho e chli weniger. So schreckt di höchi Zahl d Läserinne und Läser uf, wi d Diskussione unterm NAU-Artikel zeiged.

Aber vo de 500 Chind in de Schlagziile blibd scho nümm eso vil übrig, we me Artikel uf NAU dann duet läse. De Autor rächned mit bis zu 300 Chind glichzitig in de Halle. Aber au di Zahl chönnd no dütlich z höch si.

Mir hend ois bim Marco Baumann, em CEO vom Tägi erkundiged. Er bestätiged, dass s Turnier stattfind, betont aber, dass d Teams, über di 2 Täg verteilt, gstaffled chömmed. Di tatsächlich Aazahl Chind, wo glichzitig in de Halle sind, chönnd au dütlich unter 300 si. Es siged nie meh wi 150 Chind glichzitig in de Drüfachhalle gsi. Wil s BAG Nachwuchssport U 20 ohni Begränzig erlaubt, entspricht s Turnier de Vorgabe, so betont er und au d Polizei hetti vor Ort kontrolliert und sig z frife gsi.

Klar isch aber au, dass d Eltere ned bim Turnier zueluege dörfed und, dass damit d Chind, die jüngste Turnierteilnehmer sind schints erscht 5i, d Ziit in de Halle ohni ihri Eltere müend bestrite.