D Freiziit-, Sport-, Event und Gastronomie-Branche profitiert no nde vo de Lockerige, wo de Bundesrat geschter, 24. Februar 2021 kommuniziert het. Gliichwohl het sich s Tägi entschide, d Aalag schrittwiis z öffne.
Di erschte Schritt zunere Öffnig vom Tägi erfolged scho am 1. März, schriibd d Tägi AG innere Mediemitteilig. Grund isch, dass Sport, bi dem es ned zuemen direkte Körperkontakt chunnd, für Chind und Jugendlichi (bis und mit Johrgang 2001) wider erlaubt isch. Ab em Mentig chönnd deshalb d Schuele und d Verein mit em Schwimmunterricht und em Trainig (für U 20) starte. Zudem wird Jugendliche ab em 10 Läbesjohr, bis und mit Jahrgang 2001 jewils am Samschtig und Sunntig vom Eis am Mittag bis um Sächsi am Abe de Bsuech vom Hallebad ermögliched. Wil bis zur Vollständige Öffnig vom Tägi sämtlichi Kassesystem user Chraft gsetzt sind, mpüend alli Bsuecherinne und Bsuecher en reguläre Einzeliitritt löse. Zudem müend sich alli Jugendliche am Empfang vom Tägi uswiise und sich ans Schutzkonzept halte. Bis zu de Nasszone gilt Maskepflicht. Eltere dörfed d Aalag ned beträte und Gastronomie blibt logischerwiis gschlosse.
«Au we mir ois vo de Lockerige meh erhofft hend», so de Marco Baumann, CEO vom Tägi, «wend mir mit de Teilöffnig es positivs Zeiche für d Jugend setze und hoffed sehr, dass au di übrige Bsuecher und Bsuecherinne s Tägi nach em nächschte Lockerigsschritt wider vollumfänglich chönnd nutze.» We d Aalag dann wider vollständig cha öffne, werded d Abonnement im Kassesystem wider aktiviert und d Abonenntinne und Abonennte per Brief drüber informiert, wi d Handhabig mit de Abos usgseht.
Uf de Website vom Tägi (www.taegi.ch) wird jewils über de aktuelli Stand zu de Öffnigsschritt informierd.