D Iiwohnerrot muess bi de nächschte Sitzig am 11. März 2021 über es Provisorium für d Bezirksschuel entscheide. D Kreditsumme liit bi 1.31 Millione Franke.
D Bezirksschuel Wettige wird i de nächschte Johr wachse. S Wachstum laufd schneller, wi bi de Schuelruumplanig vorusgsaid und scho bi de jetzige Belegig fehled Grupperüüm und Zimmer, wo d Lehrerinne und Lehrer sich chönd vorbereite. Das het zur Folg, dass es tifig meh Rüüm bruchd. Scho fürs Schueljohr 2021/2022 bestoht en Bedarf vo zuesätzlich acht Klasserüüm, vier Grossgrupperüüm und eme Vorbereitigsruum für Lehrer.
In Ihre Mediemitteilig zeiged d Gemeind detailliert uf, woher de Bedarf genau chunnd und welli Investitione wo bruuchd werde:
Ufgrund vo de Zuenahm vo de Schüelerzahl bruuchds füf Klassezimmer, wegem noie Fach Natur und Technik falled im Altbau zwöi Klassezimmer ewäg, wo aber bruuchd werde und au de notwendig Umbau vomene Klassezimmer in zwöi Grupperüüm erfordered en Ersatz, so dass acht noii Klasserüüm notwendig sind.
D Gmeind het au prüefd, ob Schuelruum innerhalb vo de bestehende Schulchreis zur Verfüegig stoht, was aber ned de Fall isch, wil d Uslaschtig au in de andere Schuelhüüser höch isch. Au d Mieti vo Bürorüüm wär tüürer gsi.
Di einzig Möglichkeit, de notwendig Schuelruum für s Schueljohr 2021/2022 chönne bereitzstelle, isch es Provisorium. Es sell das eine Johr überbrücke, bis de langfristig benötigti Schuelruumbedarf durch en Erwiterig vo de Bezirkschuelaalage in Hybridbauwise us Holz und Beton südlich vom Noibau im Sommer 2022 realisiert isch. S Provisorium bestoht us scho bruuchde Schuelruum-Container us Stahl und selled uf em Sportplatz a de Platanestrass ufgstellt werde.
D Kreditsumme vo 1.31 Millione Franke stezt sich wi folgd zämme: D Container choschted 550’000 Franke, d Usstattig vo de Klassezimmer und d Velounterständ witeri 470’000 Franke. Letzteres isch au e Vorinvestition, wil di Sache bi de definitive Erwiterig vo de BEZ witerhin verwendet werde. Für de Umbau im bestehende Altbau werded 290’000 Frank benötiged und hetted mit de geplante Instandsetzig vom Altbau, wo ab em Johr 2024 sell umgsetzt werde, eh müesse erfolge. Au do handled sichs also um e vorzogeni Investition.
S Kreditbegehre für d Erwiterig vo de BEZ wird em Iiwohnerrat dann in de Sitzig vom 24. Juni 2021 behandled.