S Team Bärn Zähringer het als Drittplatzierter de Iizug in di 2. Rundi gschaffd. Jetzt gohts um de Finaliizug.
D Ambitione vom Curling-Team Bärn Zähringer mit em Wettiger Marcel Käufeler sind ambitioniert. Si wend wider Schwiizermeischter werde und sich für d WM und di Olympische Spiel qualifiziere.
Nach de Vorrundi stönd si uf em dritte Platz und mit hend vom Marcel welle wüsse, wi er de bisherig Turnierverlauf und d Siigchance dued iischätze, hend si doch au zwöi Niederlage müesse hinäh.
De Startmatch gege Lausanne hetti zeiged, wi starch au das Team isch. Bi ihne sigged no einigi Feinjustierige ned perfekt gsi und de Match eigentli bis zum Änd offe, so de Marcel. Gege Gämf siged d Bärn über witi Strecke besser gsi. Er nennt es en «Wunderstein», mit dem d Westschwiizer s Ruder no hend chönne umme risse. Er und sis Team hetted aber vili positivi Schlüss us dem Match chönne ziehe.
Alli anderi Match hend si gwonne, gege de Erschtplatziert us Glaris sogar sehr dütlich. Si siged sehr starch druf, het ois de Marcel gschribe und si siged überzügt, dass si di nächschte drü Match, bi dene es um de Iizug in de Final goht, souverän werded erledige. Mir drucked d Duume.