Am Tsischtig, 5. Januar 2021 started de Grossi Rat i d Legislatur 2021-2024. Wettige stelld wider siebe Grossrätinne und Grossrät.
Spreitebach esch einisch meh de «Parlamentssitz» vom Kanton Aargau, wenn hüt de Grossi Rat zu sinere erschte Sitzig vo de noi Legislatur zammechunnd. De noi Grossratspräsident, Vize 1 und Vize 2 werded ebenso gwählt, wi d Kommissionssitz bsetzt. Aber au s Hilfespaket für d Wirtschaft, wo unter de Coronamassnahmen lieded, esch traktandiert.
Us Wettige sind witerhin d Michaela Huser, de Daniel Notter (beidi SVP), d Lea Schmidmeister, de Alain Burger (beidi SP), de Roland Kuster (CVP) und de Lutz Fischer-Lamprecht (EVP) verträte und noi d Manuela Ernst vo de glp.
Bi de Brichterstattig vom Badener Tagblatt, wo au d Leandra Knecht als Wettigeri ufgführt het, het sich en Fehler iigschliche. D Leandra Knecht läbt nach wi vor z «Ännetwettige».
