D Gmeind Wettige schmückt sich sit em 2015 mit de drü «Lüchttürm» Gartestadt, Sportstadt und Generationestadt. Vo zwoine hed sich de Iiwohnerrat geschter «verabschedet».
S Budget-Nei vom Februar hed Folge, wo die meischte Stimmbürger vermuetlech gar ned im Sinn gha händ. De Iiwohnerrat hed Angscht vor allem, wo regelmässigi Choschte zur Folg chönnti ha, au wenns eigentlich sinnvoll und nötig wär. De Iidruck jedefalls hend die chönne günne, wo am Donnstig, 25. Juni 2020 bi de Iiwohnerratssitzig debi si gsi. Nachdem de Rat d Projektierig vo de Sanierig vo de Tägerhardstrass zwüsche Weberstrass und Forhölzlistrass eistimmig gnehmiged hed, esch es mit de Einigkeit vorbi gsi.
Bi de vom Gmeindrat beahtreite 50%-Stell vom Sportkoordinator hed de Iiwohnerrat abgestimmt ob er die Stell möchti und danach über d Choschte. Debi esch die paradox Situation entstande, dass zwar all Fraktione d Notwendigkeit vo dere Stell gseh händ, d FDP, CVP und SVP sie aber gliichwohl ned händ welle. So esch denn die Stell abglehnt worde. De Ahtrag zum zwoite Punkt, de Lohnchoste vo ca. 57’000 Franke im Johr, hed de Rat dann folgerichtig abglehnt. D Bezeichnung vo Wettige als Sportstadt esch de Iiwohnerrat demit ned ganz grecht worde.
Nach ere Pause esch es denn um vier Vorstöss zum Erhalt vo de Gartestadt vo de Marie Louise Reinert und em Leo Scherer gange. Obwohl de Gmeindrat drü vo dene vier Vorstöss hed welle entgege näh, hend d FDP, d CVP und d SVP ihre Widerstand aakündiged. De Leo Scherer hed denn, au im Name vo de Postulantin Marie Louise Reinert, alli vier Vorstöss zruckzoge, verbunde mit de Hoffnig, dass de Gmeindrat zumindest en Teil vo de Idee in de BNO-Revision übernimmt. Es esch aber offensichtlich gsi, dass die bürgerliche kein zuesätzliche Schutz für d Gartestadt möchtet.
Zum Glück laufd im Langäcker de Bau vom noie St. Bernhard, so dass sich Wettige wenigstens eine vo de Lüchttürm erhalte het, d Generationestadt. Z befürchte esch aber, dass bi de Budgetberatig im Herbst mit eme «Strichkonzert» bi de Tagesstrukture und de Musikschule au de dritt «Lüchttürm» bodiged chönnt werde….