![img_20200330_2027102507761747193650355.jpg](https://wettiger-nochrichte.ch/wp-content/uploads/2020/03/img_20200330_2027102507761747193650355-678x381.jpg)
Wils e paar Lüt ned welle begriife, verschärft de Kanton d Regle. Au Wettige isch devo betroffe.
Menscheaasammlige vo meh wi 5 Persone sind im öffentliche Ruum verbote, so het es de Bundesrat wege de Usbreitig vom Coronavirus bschlosse. Wil d Polizei letschti Woche vili Verstöss gege s Verbot het müesse feschtstelle, bsonders bi Schuel- und Sportaalage, ergrifft de Kanton jetzt Massnahme. D Kantonsärztin het d Schlüssig vo allne Sport-, Freizit- und Schuelusseaalage vo de Achti am Abe bis um Achti am Morge verfüegt. Sowohl de Zuegang wi au de Ufenthalt uf dene Areal isch in dere Zit verbote.