De Aargauer Landamme und alt Gmeindamme vo Wettige isch positiv uf de Coronavirus tescht worde. Nach de Infektion vom Regierigsrat Urs Hofmann, wo geschter bekannt worde esch, esch er s zwöit Regierigsmitglied, wo de Coronavirus verwütscht het.
Wi de Kanton Aargau uf sinere Website bekannt git, isch de Landamme Markus Dieth am Tsischitg, 24. März 2020 positiv uf de Cornoavirus tescht worde. Er esch diheime z Wettige in Selbstisolation. S goht em de Umständ entsprächend guet, teild de Kanton witer mit. Au positiv teschted worde sig de Sprächer vo de Regiirig, de Peter Buri. Scho geschter isch bekannt worde, dass de Urs Hofmann und de Chef vo den Kantonspolizei, de Michael Leupold positiv teschted worde sind.
Witer teild de Kanton mit, dass de Landstatthalter Stephan Attiger und d Regierigsrät Alex Hürzeler und Jean-Pierre Gallati teilwiis vo diheime us schaffed und wenn si vor Ort müend si, d Verhaltensempfehlige vom Kantonsärztliche Dienscht und em Bundesamt für Gsundheit strikt iihalted.
D Regierigstätigkeit wird uf digitalem Wäg ufrächt erhalte. So het de Regierigsrat hüt am Vormittag e Telefonkonferenz duregfüehrt, a dere alli föif Regierigsrät teilgnoh hend und wo vom Markus Dieth gleited worde isch.
Mir wünsched allne Infofzierte gueti Besserig!