D Stimmbürgerinne und Stimmbürger händ s Budget 2020 mit ere Stüürfueserhöchig mit meh wie 73 % dütlich zrugggwise. Mir händ be de Gmeinröt und Vertreter vo allne Iiwohnerrotsfraktione gfröged, wie si d Situation iischätze.
Eis vorweg: D Gmeindröt händ, sowit sie gantworted hend, uf de Gmeindamme verwise, wo bis zur Veröffentlichung aber no kei Antwort geh hed…
Vo de Iiwohnerrotsfarktione händ d Fränzi Widmer, d Präsidentin vo de Fraktion EVP/Forum 5430 und de Christian Wassmer, Präsident vo de Fraktion CVP usführlich Antwort geh.
D Fraktion EVP/Forum 5430, seg sehr enttüscht, seit d Fränzi Widmer. De Gmeindrot und de Iiwohnerrot hätted i de Bugetsitzig nach de Rückwisig ineme intensive und konstruktive Prozess e Lösig gfunde, wo die meischte Mitglieder vom Iiwohnerrot händ chönne mitträge. Dass das vo de Stimmbürgerinne und Stimmbürger ned aaerkannt worde wär, beduured si sehr. Sie meint es seg schwirig über d Gründ für de Entschied muetzmasse, aber haltet’s für realistisch, dass de eine z veel, de andere z wenig gschtriche worde seg. Grad d Striichig vom Sportkoordinator seg vo de Sportverein velecht ned goutierd worde. D Fraktion findeds beschämend, dass de Regiirigsrot nach de Posse um d Abrechnig vo ‘Little Wettige’ a de Badefahrt 2017 scho zum zwöite Mol über e Finanzaaglägeheit vo Wettige muess befinde. Wie es mehrheitsfähigs Budget müesst usgseh, seg ihre es Rätsel.
Au de Christian Wassmer bringd sini Enttüschig dütich zum Usdruck, bsunders was d Dütlichkeit aagoht. Me chönnd doch die grosse Schulde ned eifach de nächschte Generation überlah. D Schulde und au d Abschribige, wo immer no wachsed, siged durch d Investitione bsunders i d Schuelinfrastruktur und ums Tägi entstande. Zudem siged d Gsundheitschoschte massiv aagstige. D Würkig vom Flugblatt, wo vo Einzelpersone lanciert worde seg, ohni e einzige Partei im Rugge, seg es Zeiche für d Unzfrideheit i de Bevölkerig. Dodegege d Fakte korrekt darzläge seg ned glunge. Wil d Argument und Diskussione oft unsachlich si gsi, rüeft er die intressierte Bürger uf, sich politisch z engagiere. Es seg schlicht unfair, uf Coschte vo de nächschte Generation z läbe. S Ergäbnis vo de Abstimmig interpretierd er als Uftrag, die aktuelle Leischtige vo de Gmeind z reduziere. Anderscht seg d Koschtesteigerig im Gsundheitswese und die höcheri Abschribige ned z kompensiere. Dringend notwendig seg au, de Personal- und Sachufwand in de Griff z becho und klari Prioritäte z setze.
Vo de andere aagfrogte Fraktione liged no kei Stellignahme vor und werded bi Iigang ergänzt.