De Gmeindrat nimmt Stellig zu de OASE und de Limmattalbahn

Bis zom 17. Januar 2020 laufd no die öffentlich Aahörig fürs regionali Gsamtvercherskonzept Ostaargau (OASE) und d‘ Limmattalbahn. De Gmeindrat Wettige unterstützt die meischte Massnahme.

De Gmeindrot schriibd in sinere Mediemitteilig, dass us sinere Sicht d OASE und d Limmattalbahn so ufenand abschtimmt werde müesst, dass es numme ein Rechtplanvorlag git, wo au politisch und finanziell Gsamtpacket es ned trennbars Paket selled sii. D Liniefüehrig über die zu errichtendi S-Bahn-Haltestell im Tägi würdi zueme wichtige Verchersknote führe, wo au optimal as Fuess- und Velonetzt aagschlosse wär. Dass s Trassee über d Landstrass müesst füehre, esch für de Gmeindrat im Blick uf e möglichi Erwiterig im Oschte und e Verdechtig a de Landstrass sinnvoll und sig au im 2014 i de Diskussion über de Masterplan Landstross mit der Bevölkerig so gfordered worde.

D Zäntrumsentlaschtig vo Bade mit em Martinsbärgtunnel unterstützt de Gmeindrot, fordered aber en ribigslose Übergang vo und uf d A1 bi de Uffahrt Noiehof. Klar abglehnt wird de Bau vonere noie Brugg zwüschem Juliloch bem Lidl über d Limmig uf Bade und die planed Sperrig vo de Hochbrugg für de motorisierd Individualvercher (MIV). De Bau vo zuesätzliche Infrastrukture für de MIV, so de Gmeindrot, würd de notwendig Umsteigeeffekt uf ÖV, Fuess- und Velovercher zu Nichte mache.