En Iibruchsversuech, wo am Sunntig, 15. Dezember 2019 i de Nöchi vo de Migros verüebt worde isch, het d Frog ufgworfe, wi d Situation z Wettige isch. D Aazahl Iibrüch het danke em konsequente Vorgehe vo de Polizei abgnoh.
I de letschte drü Täg hets numme de ei Iibruchsversuech z Wettige geh, het ois d Kantonspolizei (Kapo) uf oisi Aafrog mitteild. Wil d Kapo kei Aagabe zu einzelne Gmeinde machd, brichted mir vor allem über di allgemeini Entwicklig. Vo 2’739 Iibrüch im Kanton im Johr 2013 isch d Zahl im 2018 uf 1’542 Iibruchdiebstähl zruck gange. De Trend isch im Wohn- und im Gschäftsbereich rückläufig und dörfd im 2019 no einisch tüüfer si wi im 2018.
Eine vo de beide Hot-Spots isch bi ois im Limmattal, au wil d Nöchi zu de Autobahn für Iibrächer günstig isch. Insgesamt wird im Aargau öppe in 20-25 Wohnligeschafte und 7-17 Gwerbeligeschafte pro Woche iibroche.
Gliichwohl gits zu Wettige no e chli konkreteri Informatione. Sit aafangs Johr hets um Limmattal öppe 120 Iibruchdiebstähl im Wohnbereich geh. Wettige isch dodebi stärker betroffe wi d Nochbergmeinde.
Bi zwöi grosse Fahndigsaktione het d Polizei im November es wichtigs Zeiche gsetzt, schriib d Kapo. Meh wi es Dutzend Persone siged dodebi feschtgnoh worde.
D Polizei bitted d Bevölkerig um Wachsamkeit und verdächtigi Persone oder anderi Wahrnehmige setted unter Tel. 117 de Polizei gmelded werde. Zudem empfiehlt d Polizei Türe abzschlüsse und s Liecht brenne z lah.