De Iiwohnerrot vo Wettige het versuechd, di geschtrig Sitzig churz z halte. De Christian Pauli isch de noi Iiwohnerrotspräsident.
De Iiwohnerrot isch am Donnschtig, 12. Dezember 2019 zu de letscht Sitzig vom Johr zämme cho. Nebe de Wahl vom noie Rotsbüro sind drü Vorstöss vo de Marie Louise Reinert und em Leo Scherer, es Postulat vo SP/Wettigrüen, en Interpellation vo de CVP und e dringlichs Postulat vo SP/Wettigrüen traktandiert gsi. De Leo Scherer het grad am Aafang beatraid, d Vorstöss vo ihm und de Marie Louise Reinert z verschiebe, was de Iiwohnerrot bewilliged het.
Dann isch es zerscht um d Vorstöss gange und nach de Abstimmige um s noi Rotsbüro. Wi erwarted isch de bisherig Vizepräsident, de Christian Pauli (FDP), zum noie Iiwohnerrotspräsident gwählt worde. Noie Vizepräsident isch de Lutz Fischer-Lamprecht (EVP) und s Rotsbüro wird mit em Markus Bader (SVP) und em Heiri Müller (SP) kompletiird, wo noi Stimmezähler sind. Verabschieded worde isch de Hansjörg Huser (SVP), wo nach zwöi Johr s Präsidium abgeh het und nebem Serafino Mannarino (CVP), de Hanna Läng (EVP), em Dacfey Dzung (Wettigrüen) und de Yvonne Vogel (FDP) de Rot wird verloh.