Vom 15. bis zum 17. Februar 2019 het z Hamburg de EuroHockey Indoor Club Cup, Women stattgfunde. 10 Sekunde hend de Dame vo Rotwiiss für de Klasseerhalt gfehld.
Bi de «Champions League» im Hallehockey hend au d Fraue vo Rotwiiss de Klasseerhalt verfehlt. Aber anderscht wi bim Manne-Team, wo z Wien viir zum Teil dütlichi Niderlage und numme eis Unentschide erreichd het, ischs bi de Frau extrem knapp gsi.
Im letschte Match gege d Wiissrussinne us Grodno isch es um alles oder nüd gange. Es Unentschide hetti em Wettiger Dame-Team für de Verbliib i de A-Division glanged. Nach em 0-1 und 1-2 Rückstand isch es de Wettigerinne jeweils glunge, uszgliiche (23′ und 38′). Zäh Sekunde vor em Ändi vom Match het s Team vo Rotwiiss s 2-3 kassiird, so de Abstiig besigled isch gsi.