De Zivilschutz Wettige-Limmattal steckt zmitts in ere Grossüebig. Wettige isch – so s Szenario – numme schwer z erreiche.
D Landstrass Richtig Bade isch überfluetet, d A1 vor em Baregg au, bi de Furttalchrüzig isch d Strass gfährded, in d Kiisgrueb abezrütsche und vo Otelfinge her chunnd en Waldbrand uf Wettige zue.
S Szenario, wo d Grundlag für d Üebig isch, wo de Zivilschutz mit de Armee, de Füürwehr und andere Organisatione dureführd, isch komplex und simuliirt es 300-jährigs Niderschlagsereignis mit ere schwere Gwitterzelle. Di het au anderi Schäde in de Region usglöst, wi bischpilswiis en Erdrutsch mit Verschüttete am Heitersberg. Überall sind d Zivilschützer gfordered und werded noch bis morn zeige, dass si für de Katastrophefall parat sind.
