Gmeindrot het Iisprach geges Betriibsreglement 2017 vom Flughafe iigreichd

D Gmeind informiird in ere Mediemitteilig, dass de Gmeindrat Änderigsaaträg zum Betriibsreglement für de Flughafe Züri gstellt het. Di plande Opitmiirigsmassnahme würded für d Wettiger Bevölkerig e massivi Mehrbelaschtig bringe. Grundsätzlich begrüessi de Gmeindrat d Massnahme, wo zuere Erhöchig vo de Flugsicherheit diene, heissts i de Mediemitteilig, wo am 1. Oktober 2018 verschickt worde isch. Au en Optimiirig vo de Abläuf, wo e Reduktion vo de Verspötige bringe, siged z begrüesse. De Gmeindrat wot aber, dass Nachtrueh im bisherige Rahme blibd und Starts uf de Pischte 28 numme zwüsche de Sibni am Morge und em Nüni am Abig erfolged. Zudem müend, so de Gmeindrat, d Flugroute richtig Weschte eng uf de im SIL ufzeigde Rouetene gführt werde und siged erst im Ruum Niderwil/Dottike ufzfächere. Au s Nebelkonzept gemäss SIL 2 sig iizhalte.

Di Erhöchig vo de zulässige Lärmemmission z Nacht lehnd de Gmeindrat ebenfalls ab, bsunders wil de Grundsatz vo de Planbständigkeit verletzt würdi und Dokument fähled, wo d Uswürkige i de Ruumplanig ufzeiged.