De Gstaltigsplan für s Bahnhofareal, und d Teiländerig vo de Nutzigsplanung zu dem bis am Donnschtig, 27. September 2018 d Mitwirkigsfrischt laufd, isch us de Sicht vo de meischte schints e gfroiti Sach. Aber ein Wehrmutstropfe gits, zumindescht für Isebähnler.
S Bahnhofareal het historischi Schmuckstück, wi es si hüt numme no selten git. Mit em Güterschuppe, em Empfangsgebäud, de Drehschiibe und de Lokremise sind no vili ursprünglichi Gebäud vorhande. Mit de Steiremise und de beide Stellwerk sind einige au scho verschwunde. Em vorligende Gstaltigsplan cha me entneh, dass d Schienezuefahrt zu de Drehschiibe zugunschte vomene Block zwüsche Velounterstand und Drehschiibe sell wegfalle. Dagege formiirt sich Widerstand. So het ois en Fachjournalischt gschribe, dass d Drehschiibe no bruuchd würdi. Wil Fahrte mit Dampfzüg wegem Dichte Vercher uf de meischte Linie kaum no möglich sind, isch d Streck vo Wettige uf Mellige, wo ehnder weniger bruuchd wird, wichtig für settigi Fährte. Die sind aber, zumindescht teilwiis, numme aber mögli, solang d Drehschiibe funktionsfähig isch. Nöd vergässe dörf me in dem Zämmehang, dass z. B. di obe abbildedi Dampfloki vorwärts öppe 100 km/h dörf fahre, retour aber numme 40km/h. Um Lücke zwüsche de normale Züg chönne z nütze, isch s höcheri Tempo absolut zwingend.