Mit em Ruedi Sommerhalder uf em Kulturwäg unterwägs – en Spaziirgang mit de EVP Wettige-Limmattal

Guet 20 Persone hend s exklusiv Vergnüge gha, em Ruedi Sommerhalder uf em Kultrwäg Limmat zuezlosse: Vo de Holzbrugg bim Zollhuus de Limmig nache bis zu de Webermüli, ufe zur Zuefahrt zu de Chloschterhalbinsle und abe zu Kraftwerkstrass zruck i d Chloschtergärtnerei. Uf dem Wäg isch es dichts Gweb vo Iidrück us Vergangeheit und Gägewart entstande, us vilne Bilder us Landschaft, Kunscht, Technik und Erinnerig.
Vom Zollhuus her het me en schöne Blick uf d Obscht-Spaliir-Aalag am Abhang unterhalb vo de Chloschtermuur: A dere Schtell het e Schüür gschtande, wo im 1953 abbrönd isch.
We me em Fluss nach ufeluegd, chrüzed zwei Brugge für Bahn und Autos und s Gländer vo de Vorbrugg zu de Holzbrugg de Blick. Es zeigd di Bedütig vo de Limmig in frühere Ziite, wo si e Richsstrass gsi isch. Markiird wird de Platz durch es Werk vo de Lucie Schenker: es us Metalldraht glismets Volumemodell vo de Holzbrugg.
De Ruedi Sommerhalder het zwüsche de Kunschtwerk (vo de Ursula Hirsch und em Anton Egloff vor em Zwyssig-Inseli, em Heiner Richner em Roman Signer im Wasser) au d Gebäud bi de Holzbrugg erklärt: s Attenhoferhuus (s alti Fahrwirtshuus), s Doktorhuus und s Kanzlerhuus.

D Halbinsle mit de Wide, wo de Alberik Zwyssig Klarinette güebt het, d Füehrig vom Chraftwerkstollen bis zur Webermüli, di längschti Fischtreppe vo Europa, di grossartigi Strichwehrsanirig mit em Baumbestand sind witeri landschaftlichi Perle a dem Wäg. Sinnigi Akzent setzed witer s Bildstöckli vom Anton Egloff und s Grosse Wib vom Rudolf Blättler, oder d «Haifischzäh» vo de Monika Kaminska. Nöd zletscht träged d Hüser a de Chraftwerkstrass und di alte Bäum und Gärte unterhalb vo de Chloschteraalag bis zu de Gwaggelibrugg zum «Zauber» vom Ort bi. Wasser isch dazu de Schlüssel: D Mönch hend d Limmatschlauf als ihre gwählt und s Wasser us de Chloschterwasserleitig bezoge, wo vom Eigi und über d Auqaeduktbrügg no hüt zum Fischteich führt.

De Rudi Sommerhalder isch DER Kenner vo dere Landschaft. Was er bote het, isch en exkliusive Kunschtgnuss gsi. De Gründer vom Zischterzienserchloschter, de Kunschtkommission vo 1991 und ihri Nachfolger, de Zimmerlüt und Ingenieur bis zu de Künschtler und de Gärtnern vo hüt – all dene isch de Ort z verdanke. D Gsellschaft het sich nach em Spaziirgang im Unterstand vo de Chloschtergärtnerei aneme Apéro erfroit, wo den öffentliche Aalass vo de EVP Wettige-Limmattal abgschlosse het. (MLR)