Rückwisig vom Kredit für «Little Wettige» isch wahrschinlich

Screenshot us em Traktandebricht vom Dezember 2016 (Quelle: Gmeind Wettige)

Hüt isch di 4. Sitzig vom Iiwohnerrot. Wi immer im Juni, isch si mit de Abnahm vo de Rechnig und em Recheschaftsbricht «gwichtig». Dazu chunnd d Kreditabrechnig vo «Little Wettige».
D Fraktionsbricht und d Aaträg vo de Finanzkommission (Fiko) und de Gschätsprüefigskommission (GPK) gebed immer gueti Hiwiis, wi ruhig oder unruhig e Iiwohnerrotssitzig wird laufe. Mir hend d Fraktionsbricht für oich analysiirt und gönnd davo us, dass sowohl d Rechnig wi au de Recheschaftsbricht kei grösseri Diskussione werded ufwerfe. Bim Recheschaftsbricht chönnt d Usführlichkeit es Thema werde. D FDP meind nämli, er chönnt knapper verfasst und spannender gschribe werde. Bi de Rechnig gseht d SVP im Ressort «Gsundheit und Soziali Dienscht» Handligsbedarf bim Gmeindrat. Da de allergröschti Teil bundeni Usgabe sind, also vo de Gmeind müend tätiged werde, wird das aber gar nöd eso eifach si.

Scho im Vorfäld für e chli Wirbel het de Aatrag vo de Fiko gsorged, d Kreditabrechnig für «Little Wettige» bi de Badefahrt 2017 zruckzwiise. Nach de Fraktionsbricht sind d SP, d FDP, d SVP und d glp für e Rückwiisig und nach oiserne Informatione zumindescht au Teil vo de Fraktion EVP/Forum 5430. Bi de CVP wird me us em Fraktionsbrichd nöd würkli schlau. Nach de Mehrheitsverhältnis im Rot isch also mit ere Rückwiisig z rächne. Klar wird in fascht allne Bricht, dass es nöd um de Uftritt bi de Badefahrt selber goht, sondern um di öppe 46%igi Überschritig vom Kredit, ohni dass em Iiwohnerrot d Abrächnig vo de ChropfChrötte zuegänglich gmachd worde isch.