Vili Lischte cha me im Netz finde, mit Sache, wo me uubedingt set mache. Au z Wettige gits settigs, finded mir. Mir froied ois, wenn ihr ois oiri Tipps schicked und erwitered d Lischte dann entsprächend.
Hüfig heissed settigi Lischte «Things to Do Before You Die» oder «Dinge, die man dort unbedingt machen muss». Unter letschterem Titel hets Badener Tagblatt e Lischte für Bade veröffentlicht. Au z Wettige gits einiges, wo me uubedingt emol set gmach ha. Zum Bischpil:
De Isis-Stei go aaluege
In de Pfarrchile St. Sebastian isch en Stei iigmuuret, wo us de Römerziit stammt. «Wänn und wo d Isis-Inschrift genau gfunde worde-n-isch, isch nöd bekannt. Zum erschte Mol schriftlich bezügt isch si durch en Iitrag vom Aegidius Tschudi, wo vo 1533 bis 1535 zum erschte Mol Landvogt z Bade gsi isch.»
Bi de Walhalla brötle
Sit es GPS git, isch s Gheimnis um d Lag vo de Höhli nümm so gheimnisvoll wi au scho. Aber so oder so lohnt es sich, si z sueche, z finde, di schöni Ussicht z gnüsse und dete z brötle.
Über de Lägeregrat laufe
«De Bergrugge het uf de Weschthälfti en steile Grat, wo nach Norde Richtig Äredinge rasch abfallt un au uf de Südsite noch Wettige seer stotzig isch.» Trittsicher und schwindelfrei sett me uf em Wäg si, wo einen aber immer wider mit ere guete Ussicht belohnd.
D Kabinettschiibe im Chrüzgang vom Chloschter go aaluege
D Kabinettschiibe im Chrüzgang vom Chloschter Wettige sind e Sammlig vo 137 Schiibe. Di ältischte sind im Nordarm vom Chrüüzgang z gseh und stammet us de Johr um 1280/1290. Si ghöred zu de älteschte Glasmoolereie i de Schwiiz. Uf de Wappeschibe, wo vo befründete Chlöschter, de 13 alte Ort vo de Eidgnosseschaft, vo Nochbarschtädt und de Könige vo Frankriich und Schpanie im Chloschter gschänkt worde sind, findet sich Heiligelegende, Schlachtebilder, Wappe und Familiennäme vo de Spender.
Uf de Stäge de Sulperg ufelaufe
S Chrüz uf em Sulperg isch scho vo witem z gseh, d Mariekapelle im Wald hingege nöd. Aber so oder so: de chürzescht Wäg uf de Sulperg uffe isch der über d Stäge vo de Herterestross her.
In de Chloschterchile d Schrift uf em Habsburger-Sarkophag entziffere, um usezfinde, wer da scho dinegläge isch
In de Chloschterchile hets zwei Sarkophag, eine vo de Kyburger und eine vo de Habsburger. Im Habsburger-Sarkophag het im 14. Johrhundert es zitli en Chönig gläge. Uf em Sarkophag isch e bildlichi Darstellig und en Inschrift, wo uf Latin da druf duet anewiise. Wer isch es gsi?
Im Biergarte vo de LägereBräu es Bier go trinke
Chlini Brauerei sind «en vogue» und d LägereBräu isch so erfolgriich, dass si sich en de letschte 10 Johr zuere grosse vo de chline Brauerei entwickled het. Wer regionali Produkt wot unterstütze und im Summer gärn es küehls Bier trinkt, der isch im Biergarte bi de Spinnerei uf de Chloschterhalbinsle guet ufghobe.
Bim Fabian Rimann Schoggi ässe
Di beschti Schoggi wit und breit gits sicher bim Fabian Rimann a de Landstross. Dete, wo me früehner feini Wii het chönne chaufe, gits hüt exquisite Kafi und e superfeini Schoggi. Aber: Di Schoggi het ihre Priis!
Uf em Erdbeerifäld vo Lüschers Erdbeeri günne
Im Mai started d Erbeersaison und vili fiibered em Tag entgäge, wo me bi s Lüschers selber Erdbeeri cha günne. Es «Muess», we me Erdbeeri gärn het und z Wettige wohnt.
En Iisvogel a de Limmig beobachte
Johrelang het me a de Limmig um d Chloschterhalbinsle umme Iisvögel chönne beobachte. Di Lüt, wo mir kenned und regelmässig Iisvögel hend chönne beobachte, hend leider sit em Februar 2017 keine meh gseh. Aber de Läbesruum, wo d Vögel bruuched, isch umme und so dörfts e Frog vo de Ziit si, bis me wider eine cha gseh. Mir würded ois über e Mitteilig froie, wenn ihr den schöne blau-orange Vogel z Wettige würded gseh.
Bim Mövepick nacheme Wettiger Wy go froge
Sit em Herbscht 2015 gits z Wettige e Mövepick-Wyhandlig. Was es dete aber nöd git, isch Wettiger Wy. Vilicht laht sich das ändere, wenn regelmässig öppe dete innelueged und nach Wettige Wy fröged. Es ligd in oire Händ …
Und was müesst me us oire Sicht z Wettige gseh oder gmachd ha? Mir froied ois uf Ergänzig vo oich.