Am Mittwoch, 30. Mai 2018 isch vor de Sibni am Abig es Gwitter mit Hagel über d Region zoge. Bsunders krass isch es schints z Bade gsi.
Uf de Soziale Netzwerk sind vili Föteli z gseh, wo Gärte und Strosse zeiged, wo fascht winterlich usgsehnd. D Hagelkörner sind zum Teil 3-4 cm gross gsi und es git Lüt, wo das schmerzhaft hend müesse erfahre. Am Bahnübergang im Meierhof z Bade isch sogar es Auto im Iis stecke blibe. Au Wasser isch uf de Strosse teilwiis zueme Problem worde. S Gwitter isch in de Zwischeziit witerzoge.