Scho zum 45. Mol het Ends April 2018 de kantonali Füürwehrmarsch stattgfunde. Di gröschti Wandergruppe überchunnd jewils en Wander-Pokal, wo me nach drü Siig dörf bhalte. Oisi Füürwehr dörf mit sächs Siig hinterenand de zweiti Pokal bhalte.
17 Leischtigskilometer muess me bim Füürwehrmarsch zruckläge, schriibd de AGV uf sinere Website. Einisch meh sind es Aaghörigi vo de Füürwehr Wettige gsi, wo di gröscht Aazahl vo de 767 teilnehmende Lüt bi dem Marsch gstellt hend. Im Zäntrum vom Marsch, wo vo de Füürwehr Rieteberg in Zämmenarbet mit em Füürwehrverei Rieteberg, de Füürwehr Büttike/Uezwil und de Jugendfüürwehr Saarmischtorf organisiert worde isch, stoht d Kameradschaft, wo de Zammehalt bi de Füürwehre sell stärke. Au d Gselligkeit chunnt bi somene Aalass nöd z churz.
Mir vo de Wettiger Nochrichte gratuliired de Füürwehr ganz härzlich zu dem grossartige Erfolg!