De Gmeindrot het im Iiwohnerrot zwöi Abstimmige verlore

Bi de Iiwohnerrotssitzig vom 15. März 2018 het de Gmeindrot vo föif Vorstöss viir welle zruckwiise und ei Motion numme als Poschtulat entgegenäh. De Iiwohnerrot het em zweimol en Strich durch d Rächnig gmachd, teilwiis mit überraschende Allianze.
D Kreditabrechnig für d Erstellig vo de Schuelruumplanig isch am letschte Donnschtig ohni grossi Diskussione vom Rot gnehmiged worde. Anderscht isch es dann bi de Motion vom Dacfey Dzung (WettiGrüen) gsi, wo d Iiführig vonere Frogestund im Iiwohnerrot gfordered het. De Gmeindrot het das abglehnt, will es us sinere Sicht keis nois Instrument an Rächt bruchi, so de Gmeindamme Roland Kuster. Mit Motion, Poschtulat, Inerpellation und Chliner Aafrog siged gnueg Möglichkeite vorhande und au d Kultur vonere offene Verwaltig würd es de Iiwohnerröt ermögliche, Informatione z übercho. De Iiwohnerrot het das anderscht gseh und het de Vorstoss in abgschwächter Form, nämli als Poschtulat mit 24:19 Stimme bi einere Enthaltig überwise.
Bi de zöite Motion, wo vo de Ruth Jo. Scheier (glp) bi de familiäreergänzende Chinderbetroiig en Umstellig uf es Modell mit Betroiigsguetschii verlangd worden isch, het es längeri Diskussione geh. Sowohl d Marie Louise Reinert (EVP), wi au d Michaela Huser (SVP) hend sich für das noie Modell usgschproche oder zumindescht d Ablehnig vom Gmeindrot hinterfröged. Bi de folgende Abstimmig hend 16 Iiwohnerröt, vor allemvo de Fraktione glp, EVP/Forum 5430 und d SVP, für en Überwiisig vo de Motion usgschproche, während 25 Lüt, bsunders vo de CVP, de FDP und en Grossteil vo de Fraktion SP/WettiGrüen em Gmeindrot gfolged sind.
Spannend isch au d Diskussion gsi, wo de Iiwohnerrot über d Motion vom Alain Burger (SP) und em Leo Scherer (WettiGrüen) gführt het. Es isch um e ziitnöchi Behandlig vo Vorstöss gange und es het sich zeiged, dass de Rot es nöd goutiirt, wenn de Gmeindrot z lang warted, bis en Vorstoss in de Iiwohnerrot chunnt. Obwohl de Gmeindrot bereit gsi isch, di Motion als Poschtulat entgege z neh, hend d Motionär an de Motion fäschtghalte und si isch mit 39 Ja-Stimme bi 3 Nei und 2 Enthaltige (alli vo de CVP) überwise worde.
Bi de Motion vo de SVP für e Teiländerig vo de Nutzigsplanig Schutzobjekt hend vor allem formali Gründ zuere Ablehnig durch de Gmeindrot gführt und de Iiwohnerrot isch dere Argumentation gfolged und au s Poschtulat vo de Marie Louise Reinert für künschtlerischi Akzent bi de öffentliche Baute (Zehntehofschuelhuus, Tägi und Drüfachsporthalle im Margi) het trotz ere flammende Red vo ihre für ihrs Aalige im Iiwohnerrot kei Mehrheit gfunde.