Hüt isch di 2. Sitzig vom Iiwohnerrot

D Traktandelischte, wo hüt em Iiwohnerrot vorligd, gseht uf de erschte Blick harmlos us. Es dörft gliichwohl e längeri Sitzig geh.
Ei Kreditabrechnig, föif Vorstoss und ei Interpellation stönd hüt uf de Traktandelischte. Wil d Kreditabrechnig fascht e Punktlandig isch, wird si wohl wenig z rede geh, ganz anderscht gsehts bi de Vorstöss us. De Gmeindrot empfiehlt alli föif zur Ablehnig, was zu einigem Widerstand dörft führe. Au de Fraktionsbricht isch z entnäh, dass d Motionär und Postulantin an ihrne Vorstöss werde feschthalte. Bi wellene dann de Gmeindrot zwuinge wird, si gliichwohl entgegezneh, wird sich wiise. Oiser Tipp: D Motion vom Alain Burger (SP) und em Leo Scherer (WettiGrüen) het di beschte Chance, zumindescht als Poschtulat überwiise z wärde. De Unmut im Iiwohnerrot über Vorstöss, wo jahrelang unbeantwortet bliibe, isch nöd numme de Begründig vo de Motionär z entnäh, sondern au vilne Fraktionsbrichd.
Au wenn alli Iiwohnerröt aawesend sind, werde es hüt maximal 49 si. D SVP het nämli bschlosse, de Sitz vom verstorbene Iiwohnerrot Hermann Steiner erscht bi de Sitzig im Mai noi z bsetze. A sim Platz wird stattdesse e Cherze brönne.