Konzert «Solo per Due» mit em Sebastian Bohren in de reformiirte Chile

Am Sunntig cha me wider em Violinischt Sebastian Bohren in de reformiirte Chile zuelosse. De bekannti Giger, wo scho in de gröschte Konzerthalle vo de Wält musiziirt het, tritt zämme mit em erscht 16-jährige Silvan Andrea Dezini uf.
«Solo per Due» heissts Programm, wo de Sebastian Bohren und de Silvan Andrea Dezini uf ihrne Violine am 4. März 2018 um Föifi am Abig in de reformiirte Chile an de Etzelstross spile werded. Di beide Musiker kenned sich sit vilne Johr, isch doch de Silvan Dezini einisch Fachdidaktikschüeler vom Sebastian Bohren gsi.
De Sebastian Bohren isch im 1987 z Winti uf d Wält cho und het nach de Matura Violine a de Musikhochschuel z Züri, z Lozärn und z Münche gschtudiirt. Sit em 2013 isch er Mitgliid vom Stradivari-Quartett, wo z Europa und z Asie vili Konzert gschpilt het und au in Zuekunft wird spile. Als Solischt het er regelmässig Uftritt mit Ensembles, wi em Sinfoniiorcheschter Basel, em Lozärner Sinfonieorcheschter und vilne andere. Au mit em Orchestra di Padova, em Royal Liverpool Philharmonic oder de Staatskapelle St. Petersburg isch er scho ufträte. Zur Ziit spilt er uf ere Gige vom G.B. Guadagnini us em Johr 1767, wo in Schwiizer Privatbsitz isch.
De Silvan Andrea Dazini het mit sibni aagfange z Schpreitebach Gige z spile. Mit nüni het er ans Konservatorium uf Züri gwächselt. Sit em 2012 het de Silvan zahlrichi 1. Priis mit Uszeichnig übercho. Au er isch scho mit verschidnige Orcheschter als Solischt ufträte, u.a. in de Tonhalle z Züri und em Juschtizpalascht z Wien.
Mitenand spiled si am Sunntig Werk vom Jean-Marie Leclair (1607 – 1764), em Joseph Haydn (1732 – 1809), em Béla Bartók (1881 – 1945) und em Sergej Prokofjew (1891 – 1953). Di reformiirt Chilegmeind lad härzlich zum Konzert ii. De Iitritt isch frei.