Am Donnschtig konschtituiirt sich de Iiwohnerrot

Am 25. Januar 2018 isch es so wiit: De Iiwohnerrot trifft sich zu de erschte Sitzig vo de noie Legislatur. Nebe de Inpflichtnahm ständ vor allem Wahle und d Entschädigunge uf de Traktandelischte.
Alli zwei Johr wir de Präsident vom Iiwohnerrot gwählt, also de höchscht Wettiger. Das isch üblicherwis de Vizepräsident und so isch au i dem Johr de bisherig Vizepräsident Hansjörg Huser (SVP) zur Wahl vorgschlage. Als noier Vize und dadermit designiirter Präsident für 2020/21 portiirt d FDP de bisherig Fraktionspräsident Christian Pauli. Ergänzt werde sells s Büro vom Iiwohnerrot durch die beide Stimmezähler René Wyss (CVP) und d Hanna Läng (EVP). Wenn alles «normal» laufd, dann sind di Wahle unbeschtritte, werded d Nominatione doch im Vorfäld vo de Ortsparteie und Fraktione abgschproche.
Das gilt au für di iiwohnerrötliche Kommissione, also d Finanzkommission (Fiko) und d Gschäftsprüefigskommission (GPK). Für d Fiko sind folgendi Iiwohnerröt vorgschlage: De Philipp Bürgler (bisher, FDP), de Daniel Notter (bisher, SVP), de Leo Scherer Kleiner (bisher, SP/WettiGrüen), de Thomas Benz (neu, CVP), d Silvia Berz (neu, SVP), d Kristin Lamprecht (neu, SP/WettiGrüen) und de François Chapuis (bisher, CVP), wo noi au s Präsidium set überneh. Bi de GPK sind Kandidate de Andreas Benz (bisher, CVP), de Thomas Wolf (bisher, SVP), de Dacfey Dzung (neu, SP/WettiGrüen), d Angela Eckert (neu, FDP), d Manuela Ernst (neu, glp), d Simona Nicodet (neu, CVP) und de Lutz Fischer-Lamprecht (bisher, EVP), wo noi als Präsident vorgschlage isch. De Fraueaateil würd damit in beidne Kommissione markant stiige, sind doch in de letschte zwei Johr in beide Kommissione kei Frau gsi.
Witeri Wahle sind di in zwei Gmeindverbänd und di 18 Mitglider vom Wahlbüro. Zudem muess de Iiwohnerrot d Entschädigunge für di noi Amtsperiode feschtläge. De Gmeindrot schlaht e kürzig vom Sitzigsgeld vo de Fiko und e Erhöchig vo de Entschädigung vom GPK-Präsidium vor, was beides zu Diskussione dörft führe.

Ersten Kommentar schreiben

Antworten