Es isch es Zitli her, dass de RVBW es Baugsuech für e Ladestation bi de Busgarage iigreicht gha het. Sit Menitg, 16. Dezember 2019 isch de erschti eBus i de Region unterwägs.
Es isch d Linie 8, wo vo de Busgarage z Wettige uf Noiehof führt, uf dere sit hüt um Elfi am Morge en eBus unterwägs isch. S Modell heisst «Bevisa» und isch vo de schwedische Firma Scania entwickled und baud worde. Jetzt wot me im Liniebetriib bewise, dass d Technik verhebt. De Stefan Kalt, Chef vom RVBW, isch stolz uf de Bus. Es isch erscht de sibt, vo dene föif z Schwede unterwägs si, eine z Chine und eine ebe bi ois z Wettige und z Noiehof.
Scho im 2018 het de RVBW bschlosse gha, dass er uf elektrisch betribeni Stadtbus wot setze. De nächschti Schritt isch de Iisatz vomene eBus, wo d Firma Hess mit Batterie vo de ABB entwickled hed. Er sell ab Dezember 2020, also in eim Johr, uf de Linie 5 zwüsche Ännetbade und de Baldegg unterwägs si. S Baugsuech für e Ladestation z Ännetbade isch nach Aagabe vom Badener Tagblatt scho behandled worde.