D Iisfälder im Tägi sind iigweiht worde

Nachere Bauziit vo 1 1/2 Johr sind am Sunntig, 17. November 2019 d Iisfälder im Tägi eröffned worde. S Publikum het gratis chönne sini Runde dreihe, aber schuscht isch vil bote worde.
Alli sibe Gmeindröt sind do gsi, wo de Stadionmoderator vom EV Zug, de Thomy Jeker um 12i am Mittag s Eröffnisprogamm gsartet het. Bim traditionelle Eröffnigsakt het de Roland Kuster, Gmeindamme und VRP vo de Tägi AG s Band duegschnitte und dodemit d Iisfälder eröffned.
Danach isch s Fäld vom überachte Fäld frei gsi für a Argovia Stars und de Iislaufclub Wettige, wo sich gfroid hend, ändlich wider z Wettige trainiere z chönne.
De Froid hend si mit em Lied „S’Dach vom Tägi, s’Tägi isch de Hit“ und ere passende Choreografie Usdruck geh, isch doch s Training ufeme überdachte Iisfäld vil verlässlicher z plane. Danach hets vier Kür-Vorstellige vo de Iisläuferinne vom Iislaufclub geh und d Juniore vo de Argovia Stars hend sich em Publikum mit Trainingsüebige präsentiert.
Nachdem de noi Zamboni s Iis wider uf Vordermann brochd gha het, sind s EV Zug-Farmteam und s ZSC Lions-Farmteam enand uf em Iis gegenübergschtande. Di beide Teams, do drunter au Lüt us Wirtschaft und Politik und ehemoligi Spiler vo de beide Vereine, hend e spannendi Partie bote. Nacheme 4:4 zu de Halbziit, hend zum Schluss d Lions mit 2 Goal Vorsprung gunne.
Mit de Autogrammstund hend de Sven Senteler und de Josh Holden vom EVZ und de Patrick Geerig und de Lukas Flüeler vo de Lions de Hockeyfans e Froid gmachd.
Bis zum 1. März 2020 sind d Iisfälder ab de 9i am Morge offe, am Mentig jewils bis um 7i am Abe, Tsischtig bis Donnschtig und am Sunntig bis um 8i und am Fritig und Samschtig bis um 9i am Abe.
Für s kulinarischi Wohl isch ab de 12i am Mittag uf de Terrasse vom Fondue-Chalet mit warme Getränk und chline Speise gsorged und ab de 5i cha me im Chalet vier verschiedeni Fondue vom Rub gnüsse. S Chalet mit sine über 100 Plätz cha au vo Firme, Verei oder Private für Aaläss buechd werde.