S Sport- und Erholigszäntrum Tägerhard het hüt s noi Logo präsentiird. Au di noi Website isch sit hüt online!
«Freizeit. Sport. Events.» luted de Claim unterm noie Schriftzug, wo zämme mit ere farbige Figur s noii Logo vom Tägi bild. Damit zeigd sich au, dass s Tägi noii Schwerpunkt setzt, i dem wo aabote wird, hets doch bisher «Sport Fun Kongress» gheisse. De Schriftzug Tägi präsentiird sich noi in Grossbuechstabe und au d Homepage, wo hüt ufgschalte worde isch, chunnd im noie Design daher. D Farbe und Forme, wo links nebe de Schrift z gseh sind, würdi alles zeige, wo me im Tägi cha erläbe, so de Kurt Wettstein, wo mit sinere Agentur de noi Uftritt entworfe het.*
Bim hütige Medieaalass het de Präsident vom Verwaltigrot, de Wettiger Gmeindamme Roland Kuster betond, dass d Saniirig uf Kurs sig. Abgseh vo de scho kommuniziirte Choschteüberchritig, hets s Tägi d Choschte und de Zitplan im Griff. Mitti November 2019 wird d Iisbahn eröffned werde. Di zuekünftige Priise sind scho online. Uffällig isch dodebi, dass es für Iiheimischi 20% Ermässigung git, aber numme fürs s Saisonabo. Das wird nach de Eröffnig au bi de Badi eso si.
——–
*Ois gfalld s Logo. Wi finded ihrs? Mir froied ois über Kommentär uf Facebook, Twitter und Instagram.