D Saniirig vom Tägi het aagfange

Hüt, Donnschtig, 8. März 2018 isch de Spatestich vom Tägi gsi. Damit isch de offiziell Startschuss für d Saniirigs- und Umbauarbeite gfalle.
Am 27. November 2016 hend d Stimmbürgerinne und Stimmbürger vo Wettige en Kredit in Höchi vo 46’530’000.- Franke für d Saniirig vom Sport- und Erholigszäntrum Tägerhard (SET/Tägi) aagnoh. Am letschte Sunntig isch d Iisbahn zum letschte Mol offe gsi und geschter het de Abriss vo de Tribüni bim Iisfäld aagfange. Scho vorher sind Bäum uf em Parkplatz gfällt worde.
D Gmeind het hüt inere Mediemitteilig de Ziitplan für d Grossetappe vo de Saniirig bekannt geh. Am 2. Mai wird de Abriss vom Personalhuus aafah, am 4. Juni d Gsamtsaniirig vom Hauptgebäud und am 21. November 2019 sell s Iisfäld wider in Betriib gnoh werde. D Eröffnig vom Foyer, em Bistro, de Sauna, em Saal und em Office isch für de 20. Dezember 2019 terminiirt und s Hallebad sell am 27. März 2020 wider ufgoh.
S Gartebad und Minigolfaalag wird au während de Saniirig jewils in de Saison offe ha und au in de Sporthalle (als Ersatz für de Saal) sind grösseri Aaläss möglich. Dafür het s Tägi, wo sit em 1. Januar 2018 vo de gmeindeeigene SET AG (Tägi AG) gführt wird, en Catering-Vertrag mit de Migros Gnosseschaft Aare abgschlosse, so dass au ohni Restaurant d Verpflägig bi Aaläss gwährleischtet isch. De Verwaltigsrot vom Tägi het drü Mitglider, und zwar als Präsident de Gmeindamme Roland Kuster, de Martin Hitz (Sanggalle) und de Jürg Schmidli (Wettige).