Scho zum sibzehte Mal het de Rotary Club Wettige-Heitersberg s Fredis Rotary Grümpi für Mensche mit ere Beiiträchtigung organisiert. Die teilnehmende Teams hend eimol meh riesigi Froid am Fuessballspile gha.
Am 17. Fredis Rotary Grümpi hend Mensche mit underschiedliche Beiiträchtigunge ihri jährlichi Fuessball-Meischterschaft gschpild. D Mannschafte sind in verschideni Lige und Teamstärke gege enand atrette und hend mit grossem Isatz, Fairplay und Teamgeischt begeischtered. D Spilerinne und Spiler hend de höchi Temperature mit beiidruckendem Isatz und ungebrochene Froid am Fuessball trotzt. Für d Abchüehlig hend chüehli Getränk, en Wassersprinkler und zuesätzlichi Schatteberiich gsorged. So isch uf und näbem Platz während em ganze Turniertag beschti Stimmig gsi. D Fans hend ihri Teams mit vill Begeischterig unterstützt und für e tolli Atmosphäre gsorged. Jedes Goal isch lutstark bejublet worde. Nebe sportlichem Ehrgiiz hend vor allem Kameradschaft, Respekt und gegesitigi Wertschätzig de Turniertag prägt.
Bi de Rangverkündigung sind alli Teams mit grossem Applaus und ere gmeinsame Wälle gfiret worde. Alli Spilerinne und Spiler hend dörfe e Medaille entgegeneh, wo si stolz präsentiert hend. D Siegerteams vo de jewilige Lige hend zudem unter em Jubel vo de Zueschauerinne und Zueschauer ihri Pokäl i d Höchi gschtemmd. Emotione pur! Fredis Rotary Grümpi isch längst zu ere feschte Tradition worde und für vill es absoluts Highlight im August.
Genau die Moment sind es, wo s Organisationsteam vom Rotary Club Wettige-Heitersberg Jahr für Jahr motiviered, das Turnier durezfüehre. D Froid, de Zämehalt und die vile glückliche Gsichter sind de schönschti Dank für de Isatz vo alle Beteiligte. Fredis Rotary Grümpi isch hüt wit meh als es Fuessballturnier. Es isch en Tag voller Begegnige, Emotione und unvergässliche Erlebnis und für vili längst en fixe Termin im Kaländer. D Vorfroid uf die 18. Ustragig im August 2027 isch scho hüt gross.
Rangliste
| Super-Liga | Tschällänsch-Liga |
| Ponte Kickers 1 | Ponte Kickers Zofingen |
| FC Aarau Traktor azb | AWZ Cobras |
| Satis Kicker | Schürmatt Falkonpanther |
| Ponte Kickers 2 | arwo All Stars |
| arwo United | Hasi Blitz |
| FC Schlosshoppers | |
| OZL Eldorado | |
| Schürmatt Kickers |
Flavio De Nando, OK-Mitglied Fredis Rotary Grümpi