S Änderigsgsuech fürs Betriebsreglement vom Flughafe Züri liegt öffentlich uf. De Gmeindrot het Iisproch erhobe, bsunders bi d Lärmbelastig i de Nacht.
D Flughafe Züri AG het bim Bundesamt für Zivilluftfahrt es Gsuech iigreicht, zum S Betriebsreglement z ändere. Es goht um Massnahme, wo d Sicherheit selled erhöhe und de Lärm senke, was de Gmeindrot grundsätzlich unterstützt. In de Iisproch macht er aber dütlich, dass e Erhöchig vo de Kapazität pro Stund us sinere Sicht erscht dörf erfolge, wenn nochgwise isch, dass das ned zuere Überschritig vo de zuelässige Lärmimmissione chunnd. E witeri Forderig isch, dass d Lärmbelastig i de Nacht ned dörf zueneh. Mit regelmässige Lärmmessige sell das garantiert werde.
De Gmeindrot schriibt in sinere Mediemitteilig, dass er sich bewusst sig, welli wirtschaftlichi Bedütig de Flughafe het und dass de Druck uf d Kapazitäte wege de höchere Nochfrog vo ois allne höch sig. Dodebi setzt sich de Gmeindrot defür ii, dass ned einzelni Gebiet stärker belasted werde, wie anderi.