Am 22. Januar 2026 het sich de Iiwohnerrot zur erschte Sitzig vo de noie Legislatur troffe. Im Zentrum isch d Konstituierig vom Rot gsi.
De Markus Haas (FDP) het als Gmeindamme d Sitzig eröffned und d Iiwohnerröt in Pflicht gnoh. Nach ere churze Aasproch isch s provisorisch Wahlbüro gwählt worde, wo grad zur Tat gschritte isch. D Wahl vom Iiwohnerrotspräsidium und de reguläre Stimmezähler isch dann problemlos über d Bühni gange. Di nominierte Kandidate sind alli gwählt worde, also d Ursi Depentor (D Mitti) als Iiwohnerrotspräsidentin, de Markus Bader (SVP) als Vizepräsident und d Katharina Urfer (SP) und d Gabriela Keller (FDP) als Stimmezählerinne.
Bi de Wahl für d Finanzkommission isch es dann spannender worde. Fürs Präsidium sind de bisherig Adrian Knaup (SP) und noi de Roland Brühlmann (D Mitti) aaträte. Vom Jürg Meier (WettiGrüen) isch zudem d Frog ufgworfe worde, warum d Simona Nicodet (D Mitti), wo bi de interfraktionelle Sitzig vo de Mitti noch als Kandidatin gnennt worde isch, plötzlich zugunste vom Roland Brühlmann verzichtet het. Beantworte het de Markus Zoller, Fraktionspräsident vo de Mitti di Frog ned welle, so dass de Rot ohni Antwort het müesse zur Wahl schriite. Di Nominierte für d Finanzkommission sind dann alli gwählt worde, wobi d Stimmezahl sehr verschide gsi isch. De Christoph Bürgler het 48 Stimme becho, de Jürg Baumann 47, d Ema Savic 46, de Adrian Knaup 44, d Andrea Kleger 41, de Marcel Aebi 40 und de Roland Brühlmann 31. Bi de Wahl fürs Fiko-Präsidium hets zwöi Wahlgäng bruuchd. Im erste Wahlgang het de Adrian Knaup 23 Stimme becho und de Roland Brühlmann 24, bieme absolute Mehr vo 25. Im zwöite Wahlgang isch de Roland Brühlmann mit 25 Stimme gwählt worde, während de Adrian Knaup bi 23 blibe isch.
D Wahl für d Gschäftsprüefigskommission isch dann weniger spannend gsi. De Andreas Leuppi (WettiGrüen), de Fabian Arns (SP), d Marie-Christine Andres (D Mitti), d Gabriela Keller (FDP), de Martin Bürlimann (SVP), de Thomas Benz (SVP) und d Sarah Schmocker (GLP) sind alli mit 43-49 Stimme gwählt worde. Au d Wahl vom Andreas Leupi zum GPK-Präsident isch mit 44 Stimme unbestritte gsi.
Im Aaschluss an d Sitzig het de Rot dann uf Iiladig vo de noie Präsidentin gfiired.