Am Tsischtig, 20. Januar 2026 isch en usserordentlichi Ortsbürgerversammlig gsi. Es isch um di notwendige Bschlüss gange, zum d Aasidlig vomene Industrieunternehme uf de Tägerhardächer z ermögliche.
D Orstbürger hend zwöi gwichtigi Traktande gha, wo si sich geschter am Abe im Lägernsaal vom Tägi troffe hend. Zum eine isch es um d Ufhebig respektiv Änderig vomene Dienschtbarkeitsvertrag gange, wo d Ortsbürger im 2015 mit de Tägerhard Kies AG gschlosse gha hend. Dete isch es um de Kiesabbau uf de Parzelle 789 und 3271 gange, wo mit de Aasidlig vo Hitachi Energy so nüm möglich wär. Di noi Veriibarig gseht vor, dass am Standort «Tägerhardächer Nord» de Kiesabbau bis zuere Tüüfe, wo es als Baugrueb für Hitachi notwendig isch, dur d Tägerhard Kies AG cha erfolge und si d Baugrueb ned muess uffülle. Als eini vo de verschidnige Kompensatione wird Hitachi Energy d Erstellig vo de Baugrueb zu marktübliche Priise bi de Eduard Meier AG in Ufrtrag geh, wo zu de gliiche Holding wie d Tägerhard Kies AG ghört. Uf de «Tägerhardächer Süd» isch de Kiesaabau weniger iigschränkt, wil de Usbau durch de Industriekonzern erscht inere zwöite Phase planed isch. Aber au do gits e Klausle im Dienschtbarkeitsvertrag, dass de Kiesaabbau d Bauphase vo de zu erstellende Baute ned übermässig dörf verzögere. D Ortsbürger hend de verändert Dienschtbarkeitsvertrag mit 91 Ja zu 24 Nei und um di 40 Enthaltige gnehmiged.
S zwöit wichtig Traktandum isch de Vorvertrag für d Erstellig vomene Baurechtsvertrag zwüsche de Oertsbürger und Hitachi Energy gsi. Uf de Parzelle Nord goht es um 60’000 m2, wo für 50 Johr im Baurecht abgeh wird. Dodebi isch e Verlängerig vo 2×25 Johr mögli. Entsprechend sind d Veriibarige für d Südparzelle mit 40’000 m2. Zahld werde muess de Baurechtszeis ab de Erteilig vo de Baubewilligung, wo für d Nordparzelle für 2027 und für d Südparzelle für öppe 2035-2040 erwarted wird. Dem Vorvertrag hend d Ortsbürge rmit 81 Ja zu 25 Nei, ebefalls mit öppe 40 Enthaltige zuegstimmt.
Als nächschte Schritt sell am 23. Januar 2026 d Aahörig zur Aapassig vom Richtplan für en mögliche noie Industriestandort starte. Für d Bevölkerig finded dodefür am Donnschtig, 29. Januar 2026 um Sibni am Abe im Tägi en Informationsaalass statt.