Am Mentig, 19. Januar 2026 het d Iiwohnergmeind zur Infoveraastaltig zu de Schuelruumplanig iiglade. Cho sind vil meh wie erwartet.
Fascht 300 Lüt sind es gsi, statt de erwartete 120, wo sich am Mentig über d Schuelruumplanig hend welle la informiere. Dodebi het de Christian Wassmer, Gmeindrot mit em Ressort Bildig, dra erinnered, wie es überhaupt zu de Masterplanig für d Schuel cho isch. Uslöser isch d Ablehnig vo de Erwiterig vo de BEZ im Iiwohnerrot im September 2021 gsi. Es isch d Forderig nachere Gsamtschau ufcho. So het d Gmeind d Masterplanig gstarted, bi der alli Partei, d Schuel und d Bevölkerig iibezoge worde isch.
Zu de Masterplanig ghöred vier meh oder weniger grosse Projäkt. Zum eine de Erwiterig vom Schuelhuus Alteburg und de Übernahm und em Umbau vom bisherige Chilegmeindhuus vo de reformierte Chile. Zum zwöite mit ere Erwiterig vom Margeläcker mit eme Oberstuefezentrum und Sportaalage uf de Zirkuswise. S dritti Puzzleteili isch d Unnutzig vo de hütige BEZ zuere Primarschuel und S vierti isch d Nutzig vom Zehntehof für d Primarschuel Dorf.
Alles zämme wird d Gmeind öppe 200 Millione Franke choschte.