Am Sonntig, 11. Januar 2026, isch de ökumenisch Gottesdienst für d Einheit vo de Chrischte gsi. Christkatholike, römischi Katholike und di Reformierte hend in de reformierte Chile zämme gfiired.
De ökumenisch Gottesdienscht in de Einheitswoche het e langi Tradition, au bi ois z Wettige. So hend di drü Chilene au i dem Johr gmeinsam gfiired. Gstaltet worde isch de Gottesdienscht vom römisch-katholische Pfarreiseelsorger Marcel Chopard, em christkatholische Prieschter Theo Pindl, em reformierte Pfarrer Lutz Fischer und em Boyan Kolarov an de Orgle. In sinere Predigt über Maria und Martha (Lk 10, 38-42) het de Marcel Chopard betont, dass Jesus d Maria und Martha ned het welle gege enand usspile. S Motto sig, was immer du machsch, machs mit Härz. Nach dem Motto het de Boyan Kolarov au gordled. Mit viel Härzbluet het er d Gottesdienschtbsuecher, wo sich aaschlüssend zum Apéro im Chilegmeindhuus troffe hend, chönne begeischtere.