Nach de Brandkatastrophe i de Silvesternacht z Crans-Montana froged sech au veeli Lüt z Wettige, wie das eigentlich gregled esch be eus im Aargau und au z Wettige. D Gmeind wird in nächschter Ziit d Gastrobetrieb verstärckt kontrolliere.
D Zueständigkeite sind i de Brandschutzverordnig vom Kanton gregled. Für grossi und risikoriichi Aalage esch d Aargauischi Gebäudeversicherig zueständig. Das betrifft zum Biispiel di grosse Iichaufszentre wie Migros und Coop, Hochhüüser, Schuelaalage, Heim und grossi Rüüm mit ere Personebelegig vo meh wi 300 Lüt.
Di chlinere Aalage und Liegeschafte liged i de Zueständigkeit vo de Gmeinde. I de geltende Brandschutzverordnig vom Kanton sind kei obligatorischi, periodischi Kontrollintervall dur d Behörde festglegt. D Verordnig gseht vor, dass nach Bedarf, periodisch oder im Einzelfall e Kontrolle cha duregfüehrt werde.
Uf di Kontrolle isch im kommunale Bereich bisher verzichtet wurde.
Wege de aktuelle Ereignis esch d Abteilig «Bau und Planig» i Zämearbet mit de Regionalpolizei am Organisiere vo Kontrolle i Gastroberieb z Wettige.
D Verantwortig defür, dass d Brandschutzvorschrifte iighalte werde, Fluchtweg beschildered und Fluchttüre vo inne chönd geöffnet werde, liged bi Eigetümer und Betriber. Au setted d Gäng ned verstellt si, so dass es zügiges Verlah vonere Liegeschaft im Brand- oder anderem Katastrophefall jederziit möglich esch.