Es esch demnächscht weder so wit. Au das Johr werded a diverse Ort z Wettige Christbäum verchauft.
Traditionell esch KAB uf em Rathuusplatz be de grosse Tanne aaztreffe. Det send Nordmanntanne, Blautanne und au die klassischi Rottanne im Aagebot. D Bäum chömmed us Wettige, Herznach und Lüggere unter em Aschpeckt vo de Nachhaltigkeit. Dank de chorze Transportwäg send die Bäum frösch ond hebed länger. «För veeli vo eusne zom Teil langjährige Chunde esch ned nor s Usgseh vom Baum wechtig. Mer büted näbe de Berotig ond Verpackig bi Bedarf au de Transport a oder montiered de Ständer», said de Karl Spörri vo de KAB Wettige.
De Erlös vo dene verchaufte Bäum god ad ARWO und ad Mission Brücke – le Pont.
Göffnet isch de Christbaumverchauf vo KAB vom 10. Dezember bis am 23. Dezember, Mändig bis Fritig am Vormittag vom Nüni bis um Zwölfi und am Namittag vo de Halbizwöi bis um Halbisibni, am Samschtig ab de Nüni bis um Föifi am Namittag. Scho zum 4. Mol finded det am Samschtig, 13. Dezember e Suppe/Kaffi-Aktion statt!
En witere beliebte Christbaum-Verchauf esch de von de Famile Benz uf em Ziegelhof a de Landstross 227. De findet das Johr de Bar und Grill-Event am Samschtig 13. Dezember zwüschem Zehni am Morge und em Sächsi am Abig statt. Christbäum gits aber scho ab sofort uf em Ziegelhof!
Bem Peter Steimer, a de Fohrhölzlistrasse (uf de andere Sitte vo de Bahngleis, bem Gartebad), chamer das Johr e Christbaum-Schnittziit reserviere. Am Samschtig de 20. Dezember zwüsche 9.00 und 11.30.
Nebe dene erwähnte Ort get’s natürlich au Möglichkeite uf em Lüscherhof a de Unter Geisswiesstross direkt ab Hoflade go Christbäum go chaufe. A de Schartestross, nebem Pfarreiheim, au direkt vom Hof und us de Region, be de Chlosterweine a de Bergstross 67, be de Migros a de Landstross, bem Coop im Tägipark, uf em Zentrumsplatz, und und und ..
Uf jede Fall veel Vergnüge bem Ussueche vom schönste Christbaum …..