Als Nachfolg vo de Wybaugnosseschaft isch am 21. August 2019 d WyStärn AG gründ worde. Am Donnschtig, 23. Oktober 2025 isch di 5. ordentlich Generalversammlig (GV) gsi.
S Gschäftsjohr vo de WyStärn AG laufd jewils vom 1. Juli bis zum 30. Juni im Folgejohr. In de Aula vo de Schuel Margeläcker hend sich hüt d Aktionär troffe, zum de Jahresbricht und d Jahresrechnig abzneh und zum de Verwaltigsrat und d Revisionsstell z wähle.
Mach eme Gwinn vo 13‘776 Franke im Gschäftsjohr 2023/24 het es im 2024/25 en Verlust vo 67‘261 Franke geh. Mit en Grund für de Verlust sind d Choschte für d Eröffnig vom Ladelokal a de Landstross gsi. D Mietchöschte sind höcher, aber au d Lohnchöschte sind gstige, au wil d Öffnigsziiten anderscht sind, wie früehner a de Rebbergstrass. Zudem merkt au de WyStärn, dass de Wykonsum i de Schwiiz insgsamt retour goht.
Tagespräsident isch de Gmeindamme Roland Kuster worde. Er het souverän durch s Traktandum Wahle gführt und de bisherig Verwaltigsrat isch im Amt bestätigted worde. Zudem isch de Stephan Kim noi i de Verwaltigsrat gwählt worde.
Nach em Bricht über d Wyjohr und ere Vorschau uf 2025/26 sind d Aktionär no für en Imbiss und eis (oder meh?) Glas Wy zämme blibe und hend uf ihri AG aagstosse.