De Iiwohnerrot het am Mittwoch, 15. und Donnschtig, 16. Oktober 2025 grad an zwöi Abige hinterenand Sitzige gha. Am Mittwoch sind de Finanzplan und s Budget 2026 traktandiert gsi, am Donnschtig en Teil vo de Revision vo de allgemeine Nutzigsplanig (ANUP) und zwöi Kreditbegehre.
Wi erwartet isch es am Mittwoch bi de Budgetsitzig spot worde. De Iiwohnerrot het über 11 Strichigsaaträg vo de Finanzkommission diskutiert und entschiede. Au d Fraktione hend teilwiis Chürzigsaaträg gstellt und SP/WettiGrüen het au Aaträg gstellt, zum meh Gäld usgeh. Insgsamt isch es aber ned um grossi Summe gange. Drümol het de Iiwohnerrotspräsident Christian Oberholzer en Stichentscheid müesse fälle. Alli Partei sind isch einig gsi, dass d Finanzlag z Wettige verheerend isch. De Finanzplan, wo vor em Budget diskutiert worde isch, zeiged, dass de Gmeindrot bis zum Johr 2034 mit ere Schuldelascht vo 11’271 Franke pro Iiwohner rächnet, trotz zwöi iigrächnete Stüürfuesserhöchige. Nach de Empfehlig vom Kanton wär bi 2’500 Franke d Obergränze. SP/WettiGrüen het us dem Grund am Schluss vo de Debatte de Aatrag gstellt, de Stüürfuess uf 98% z erhöche, was aber numme vo de EVP unterstützt worde isch. Me het de Iidruck becho, dass die einde de Bevölkerig per Stüürfuesserhöchig wend zeige, dass d Gäld ned langed und di andere durch Aaträg uf Strichtige, wo dann irgendeinisch de Lüt würkli weh düend.
In de Sitzig am Donnschtig sind dann de Rahmetarif über d Gebühre, de Gwässerruum vo de ANUP, es Kreditbegehre für es Höherettigsfahrzüüg für d Füürwehr, es Kreditbegehre für Werkleitigs- und Oberbausanierig vo de Jurastross zwüsche Zentral- und Landstross, d Kreditabrechnig für d Fassadesaierig und de Umbau vom Parterre a de Rigistross 10 und es Postulat vom Martin Hürlimann (SVP) für d Verlosig vomene Stüürbetrag traktandiert gsi. Am meischte z Rede geh het s Projäkt a de Jurastross, wo uf Aatrag vo de Finanzkommission a de Gmeindrot zruckgwise worde isch. D Abstimmig het gheim stattgfunde und d Rückwisig isch mit 24 zu 21 Stimme chnapper gsi, wie d Fraktionsbricht vorher hend lah vermuete. S Höherettigsfahrzüüg für d Füürwehr, wo de Hubretter vo 2005 sell ersetze, isch weniger umstritte gsi, wie denkd. Di kritischte Tön sind vo de Mitti cho, wobi d Gschicht, wo de Fraktionssprecher verzällt het, ned für alli nachvollziehbar gsi isch. D Füürwehrlüt, wo in grosser Zahl uf de Tribüne aawesend gsi sind, bechömmed jedefalls ihres Fahrzüüg, für das d Gmeind 700’000 Franke in d Finger muess ned und Aargauisch Gebäudeversicherig 300’000.