Am Donnschtig, 2. Oktober 2025, sind im Rothuus z Wettige de Aspirant Alessio Vincenzi und d Polizistin Isabella Ringli i feierlichem Rahme vom Gmeindamme Roland Kuster vereidiged worde.
«De Polizeiberuef fordered ned nume vil vo de Ordnigshüeter sälber, sondern au Verstandnis und Flexibilität im private Umfeld», het de Gmeindamme Roland Kuster bi de Vereidigung betond. Drum sind bim Glöbnis ned nume alli Aaghörige vo de Regionalpolizei Wettige-Limmattal debi gsi, sondern au Fründe und Familie vo de zwöi Vereidigte und au Gmeinderöt vo Wettige.
De Roland Kuster het em Alessio Vincenzi und de Isabella Ringli danked, wo mit ihrem Glöbnis versproche hend, ihri Pflicht z erfülle und Grechtigkeit z üebe für ihri Arbet im Gebiet vo de Regionalpolizei Wettige-Limmattal.
D Regionalpolizei Wettige-Limmattal isch für di öffentlich Sicherheit i de Gmeinde Bergdietike, Killwange, Noiehof, Spreitebach, Wettige und Würelos zueständig, wie de Kommandant Oliver Bär erklärt het:
«Dafür bruuched mer verlässichi Lüüt, wo Verantwortig übernehmed und willig sind, sich für d Bürgerinne und Bürger im Limmattal iizsetze.“
Er het de frisch usbildete Polizist Vincenzi und di scho am 1. Juli 2025 iigtreteni Gefreiti Ringli im Korps herzlich willkomme gheisse.