Ned alli, wo für de Gmeindrot kandidiere, chönnd ihri Vorstellige für d Zuekunft vo Wettige frei üssere. Mir hend mit em Markus Haas drüber gred, warum das eso isch.
Bi oiserne Froge an die drü Manner, wo als Gmeindamme kandidiere, het de Markus Haas zu de aastehende Revision vo de Allgemeine Nutzigsplanig und zum Masterplan Schuel ned würkli chönne säge, wie er persönlich dezue stoht. Als einziger bisheriger Gmeindrot unterstoht er, wie au d Kirsten Ernst, de Martin Egloff und de Philippe Rey em Amtsgheimnis. Bschlüss, wo de Gmeindrot gfasst het müend sie mitträge, aber lueged eifach selber, wie das genau isch.