Wie di reformiert Chilepfläg mitteild, chönnd de Kochherd, d Öfe und di vordere Schiiwerfer vo de Bühnebelüchtig nüm bruuchd werde. Für di ei oder ander Veraastaltig het das dütlichi Uswirkige.
Im Herbst 2026 wird di reformiert Chilegmeind vom bisherige Chilegmeindhuus in de Noibau zügle, wo aktuell a de Lägerestrass im Bau isch. S bisherig Chilegmeindhuus wird vo de Iiwohnergmeind übernoh, wo am Usschaffe vomene Projäkt isch, zum de notwendig Schuelruum im Schuelchreis Alteburg z realisiere. Us dem Grund het d Gmeind e Bauschadstoffuntersuechig lah durefüehre.
Es het sich zeiged, dass es bi de Brandschutzplatte vo de Bühnebelüchtig lose gebundenes Asbest het und bi de Backöfe und de Herdplatte de Verdacht uf lose gebundenes Asbest bestoht. Beides erfordered entweder Sanierigsmassnahme oder d Stilllegig vo de Grät. Wil Sanierigsmassnahme höchi Choschte nach sich ziehe und uf de andere Siite s Zügle ins noie Chilegmeindhuus im Herbst 2026 wird erfolge, het d Chilepfläg bschlosse, d Kochherd, d Backöfe und di Schiiwerfer zwüschem chliine und em grosse Saal usser Betrieb z setze. E Gfahr für d Bsuecherinne und Bsuecher vo Veraastaltige vo de Chliegmeind und vo de Chind vom Tagesstern het zu keinere Ziit bestande.
Für interni Veraastaltige, wie de Spaghettata, sueched di Verantwortiche nach mögliche und finanziell vertretbare Alternative.