Alli Kandidatinne und Kandidate für de Gmeindrot stönd im Rathuussaal Red und Antwort: Am 27. August gits für d’Wettiger Stimmbevölkerig di erst grossi Glägeheit, alli Kandidatinne und Kandidate für de Gmeindrat im direkte Vergliich z’erläbe. D’Ortspartei «Die Mitte» ladet zur öffentliche Podiumsdiskussion in de Rathuussaal ii.
De politisch Herbst stoht vor de Türe: Am 28. September 2025 wählt d Stimmbevölkerig de neu Gmeindrot. D’Usgangslag verspricht Spannig. Es gaht nöd numme um d’Nochfolg vom langjährige Gmeindamme Roland Kuster, sondern au ums Vizeamme-Amt und überhaupt d Zammesetzig vom Gmeindrot.
Demit sich d’Stimmbürgerinne und Stimmbürger es guets Bild chönnd mache, organisiert d’Partei «Die Mitte» e grossi Podiumsdiskussion, wo vom Marco Kaufmann (Forum 5430 und alt Iiwohnerrotspräsident) moderiert wird. De Aalass bringt alli zeh Kandidatinne und Kandidate, wo sich für es Amt im Gmeindrot zur Verfüegig stelled, an ein Tisch.
D’Verastaltig im Rathuussaal git d’Chance, d’Kandidatinne und Kandidate persönlich z’lehre kenne und ihri Positione zu de wichtigschte politische Theme i de Gmeind z’ghöre. Wo sind d’Gmeinsamkeite, wo d’Underschiid? Wie luted d’Lösigs-Aasätz für die aktuelle Useforderige i de Bereich Bildig, Finanze, Ruumplanig, Sozials und Umwelt? Di moderierti Diskussion wird de Kandidierende uf de Zahn füehle und de Wähler en Iidruck vo de Vorstellige vo de Kandidatinne und Kandidate für Wettige geh.
Ufem Podium werded vorussichtlich alli elf Kandidatinne und Kandidate teilneh.
Glägeheit zum persönliche Gspröch bim Apéro
Im Aaschluss a d’Podiumsdiskussion sind alli Bsuecherinne und Bsuecher zumene Apéro iiglade. Die Rundi i lockerem Rahme isch di perfekt Glägeheit zum mit de Kandidatinne und Kandidate direkt ins Gspröch z’cho.
De Aalass isch am Mittwoch, 27. Augschte 2025 um Sibni am Abe im Rothuussaal Wettige.