D Meldefrist für d Gmeindswahl vom 28. September 2025 isch abgloffe und d Gmeind het mitteild, wer sich aagmeld het. Insgsamt kandidiered 11 Persone für di 7 Sitz im Gmeindrot.
Nebem Iiwohnerrot und de Stüürkommission wird Ändi September au de Gmeindrot noi gwählt. vo de siebe Bisherige träted vier wider aa, drü verzichted uf e Kandidatur. Ob es in de noie Legislatur, wo am 1. Jänner 2026 started, numme drü noii Gmeindrät git oder öppe vo de Bisherige sin Platz muess ruume, blibt abzwarte. Sicher isch, dass s Amt vom Amme und vom Vizeamme noi z bsetze sind. Als Gmeindamme kandidiered de bisherig Gmeindrat Markus Haas (1965, FDP), de Orun Palit (1965, GLP) und de Adrian Knaup (1972, SP). Au bim Amt vom Vizeamme gites en Uswahl, di isch sogar no e chli grösser, wie bim Amme: Es kandidiert de bisherig Gmeindrat Philippe Rey (1957, parteilos), wo scho vor acht Johr erfolglos als Vizeamme kandidiert het, de Markus Bader (165, SVP), wo scho vor vier Johr versuechd het, Vizeamme z werde, d Lilian Studer (1977, EVP) und de Christian Wassmer (1965, Die Mitte). «Numme» für de Gmeindrot kandidiered di bisherige Kirsten Ernst (1964, SP) und de Martin Egloff (1965, FDP) und neu de Roland Brühlmann (1962, Die Mitte) de Jürg Meier Obertüfer (1966, WettiGrüen).
Uf de erschte Blick uffällig isch, dass dütlich mehr Manner (9) wie Fraue kandidere (2), die meischte Kandidate Jahrgang 1965 hend (5). Drü Kandidierendi sind älter wie die 5 Manner und drü sind jünger.
Sicher isch, dass es en spannendi Wahl wird.