De «Ängeliwäg» isch en neue Skulpturewäg z’Wettige, wo speziell für Chend und Familie gmacht worde isch. Er füehrt an zwölf Ängelskulpture vom bekannte Wettiger Bildhauer Eduard Spörri verbi.
D’Idee zum Ängeliwäg isch vom Kurator Marc Philipp Seidel während de Corona-Pandemie cho, wo d’Musee gschlosse gsi sind.
De Wäg isch öppe drei Kilometer lang und startet offiziell bi de grosse Ängelsstatue hinter de Chloschterchile. Zum Wäg git’s es Begleit-Heftli mit Mundart-Gedicht vo de Sophie Haemmerli-Marti, wo mer per QR-Code au lose cha. Usserdäm git’s im Heftli Spieli, es Quiz und Bilder zum uusmale für d’Chend. Über witeri QR-Codes chan mer interaktivi Charte und meh Infos zum Künschtler abelade.
De Wäg söll s’Schaffe vom Eduard Spörri uf e spielerischi Art nöcherbringe und gliichziitig Wettige als interessante Kulturort zeige. Er isch eifach z’bewältige und bietet underwägs Spielplätz und Rastmöglichkeiten.
S’dazue passendi 40-siitigi Begleit-Heftli «Vo Ängel, Blueme und Stärne» cha me zäme mit eme zwölfteilige Farbstift-Set im Wettiger Gasthof Stärne, im Chloschter-Shop, im Museum Eduard Spörri oder über www.eduardspoerri.ch/ängeliweg per Poscht bstelle.